ప్రకటన 21:1,2 - "అంతట నేను క్రొత్త ఆకాశమును క్రొత్త భూమిని చూచితిని,
మొదటి ఆకాశమును మొదటి భూమియు గతించిపోయెను. సముద్రమును ఇకను లేదు..
మరియు నేను నూతనమైన యెరూషలేము అను ఆ పరిశుద్ధపట్టణము తన భర్తకొరకు
అలంకరించబడిన పెండ్లికుమార్తెవలె సిద్ధపడి పరలోకమందున్న దేవునియొద్దనుండి దిగి
వచ్చుట చూచితిని."
దైవిక అగ్నిచే ఈ లోకం నాశనం చేయబడే రోజు ఒకటి వస్తుంది (2 పేతురు
3:7-13). దేవుడు క్రొత్త ఆకాశము, క్రొత్త భూమితో దానిని మార్చుతాడు. "నూతన
యెరూషలేము" అని పిలువబడే మహిమకరమైన పట్టణాన్ని ఆవిష్కరిస్తాడు. అన్ని యుగాలకు
చెందిన విమోచింపబడిన జనాంగం ఆయనతో కూడా దానిలో నివాసం చేస్తారు.
బైబిలులోని చివరి రెండు అధ్యాయాలు ఆ అద్భుత స్థలాన్ని గురించి చెబుతాయి.
అది నూతన పట్టణము (21:1,2, 4-5). ఈ భూమి మీదనున్న పట్టణాలవలెగాక, అది
ఎన్నటికి పాడవదు. మరమత్తులు అవసరంలేదు. అది సంపూర్ణంగా నిత్యం అలంకరింపబడి
వుంటుంది. అది పరిశుద్ధ పట్టణము కూడా (21:2,3,8), అది పెండ్లి కుమార్తెవలె
పవిత్రమైనది. పరిశుద్ధమైనది. క్రీస్తును తిరస్కరించిన పావులు అందులో ఉండరు. అది
సంతోషకరమైన పట్టణము (21:4). అక్కడ రోగం గాని, దుఃఖం గాని, శ్రమలు గాని
ఉండవు. యేసు సన్నిధిలో సంతోషంగా ఉంటాం. అది ఆశీర్వదించబడిన పట్టణము (21:6,7,
22:1-3) పాపము శాపం అక్కడ ఉండదు. జీవజలం పారుతూ, జీవవృక్షం వికసిస్తుంది.
ఆకులలో స్వస్థత ఉంటుంది. అది సుందరమైన పట్టణం (21:9-21), బంగారపు వీధులు,
రత్నపు గోడలు, ముత్యాల గుమ్మాలు అది క్రీస్తు కేంద్రిత పట్టణము (21:22-26), సూర్యుని,
చంద్రుని, నక్షత్రాల స్థానంలో యేసే ప్రకాశిస్తాడు. చివరగా, అది ప్రత్యేకమైన పట్టణం
(21:27; 22:10-17). యేసు రక్షకునిగా ఎరిగినవారు మాత్రమే అందులో ప్రవేశిస్తారు.
నూతన యెరూషలేములో నీవుంటావా? నీవు ఆ బంగారపు వీధులను చూస్తావా?
అలాంటి సుందరమైన భూభాగంలో యేసు కాంతి నీ ముఖం మీద ప్రకాశిస్తుందా? దేవుని
జీవజలపు ఊటనుండి నీవు త్రాగుతావా? అలాగైతే, సంతోషించి, పాడుము. "నేను యేసును
చూసే ఆ దినం ఎలాంటిది. నేను ఆయన ముఖాన్ని చూచినప్పుడు, తన కృపద్వార
రక్షించినవాడు, నా చేతులను తన చేతులలో పట్టుకొని వాగ్దాన భూమికి నన్ను
నడిపించుచుండగా, ఆ రోజు ఎలాంటి రోజు, మహిమకరమైన రోజు"
